ОРАЛ. Қыркүйектің 1-і. ҚазАқпарат /Елжан Ералы/ - БҚО-ның Жәнібек аудандық балалар кітапханасы күрделі жөндеуден кейін қайта ашылды, деп хабарлайды ҚазАқпарат тілшісі.
Кітапханаға жөндеу жұмыстарын жүргізген мердігер «Символ» жауапкершілігі шектеулі серіктестігінің басшысы, облыстық мәслихаттың депутаты Ескендір Елемесов жаңадан ашылғалы тұрған кітапханаға байғазы ретінде кілем мен DVD тарту етті.
Аудан әкімінің орынбасары Қазбек Меңеев пен аудандық мәслихаттың депутаты, аудандық қоғамдық кеңестің төрағасы Амангелді Уәлиев лента қию рәсімін жасағаннан кейін «жақсыны көрмек үшін» деп жиналған қауым ішке енді. Ғимараттың сырты көздің жауын алып, қалай жұтынып, тұрса, іші де сондай керемет екен. Қыздың жиған жүгіндей жайнап, сәні мен салтанаты келісіп тұр. Кітапхананы аралап шыққан көпшілік екінші қабатқа көтеріліп, қоғамдық негіздегі мұражаймен танысты, ондағы жинақталған жәдігерлерді, тарихи құжат-фотосуреттерді көріп тамашалады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).