«Автобус жүргізушілері еңбек туралы заңға сәйкес жұмыс істемейді. Олар тиісті нормадан артық жұмыс істегендіктен дұрыс демалмайды. Бұның барлығы автобус жүргізушілердің жетіспеушілігінен. Бүгінде қаладағы 8 автопаркте барлығы 1 678 жүргізуші жұмыс істейді, бізге тағы 790 автобус жүргізушісі керек. Егер автопарктерге субсидия берілсе, тапшылық мәселесі аз да болса шешіледі», - деді Ж.Жалбыр қалалық мәслихаттың отырысында.
Оның айтуынша қоғамдық көлік жүргізушілері негізгі міндеттерінен бөлек, автобусты жуу, жанар май құю және жөндеу жұмыстарын да қоса атқарады.
«Олар таңғы 5-те жұмысқа шыққаннан кешкі 10-11-ге дейін тоқтаусыз жүреді. Одан кейін, автобустың жанар майын құйып, оны жуып ертеңге дайындап қояды. Үйіне барамын дегенше түнгі 2-ге таяйды, содан 2-3 сағат ұйқыдан соң қайта тұруға тура келеді. Осыдан да қалада қоғамдық көлікпен апатты жағдайлар жиі орын алады. Біз осы тұрғыда талдау жұмыстарын жүргіздік. Оның нәтижесі бойынша 72% жүргізушінің жүйке жүйесі адамдармен жұмыс істеуге және оларды тасылмауға сәйкес келмейді. Талап бойынша олар жол бойы 360 градуста жан-жағын бақылауда ұстап отыруы қажет», - деді ол.
Астана LRT өкілінің сөзіне сенсек, қоғамдық көлік жүргізушілері жетіспеушілігінің тағы бір себебі - жалақының аз болуы.
«Қазіргі күні жүргізушілер кондуктор қызметін қоса атқарады. Осы орайда олардың қызметтік функциясын қайта қарап жалақыларын соған сәйкес есептеу керек. Біздегі жүргізушілердің 80% өңірден келгендер, әрине олардың басты проблемасы баспана. Сондықтанда бұл жерде мәселені кешенді түрде шешу керек. Сондай-ақ, біз жүргізушілердің қызметтік имиджін көтеру мақсатында олардың зейнеткерлікке шығу жасын төмендетуді ұсынудамыз», - дейді орталық басшысы.
Аталған ұйымның дерегіне сүйенсек, өткен жылы Астанада қоғамдық көлікте орын алған жол апаты оқиғасы 18 % төмендеген. Атап айтқанда, 2018 жылы 1 632 жол-көлік оқиғасы орын алып, оның 566-на автобус жүргізушілері кінәлі деп танылды.