Атырауда синтетикалық есірткі сатпақ болған теріс діни ағымның өкілі ұсталды
04:21, 08 Маусым 2020
АТЫРАУ. ҚазАқпарат –Атырауда синтетикалық есірткі сатпақ болған теріс діни ағымның өкілі ұсталды, деп хабарлайды ҚазАқпарат.
Атырау облыстық полиция департаменті экстремизмге қарсы күрес басқармасының қызметкерлері ҰҚК департаментімен бірге өткізген жедел-іздестіру операциясы кезінде синтетикалық есірткі өткізбек болған азаматты ұстады.
«Күдіктінің жасы 32-де. Тексеру кезінде оның теріс діни ағымның өкілі екені анықталды. Одан синтетикалық есірткі заттары, тыйым салынған діни әдебиеттер, қолдан жасалған жарылғыш заттарды дайындауға қажетті компоненттер тәркіленді», -деп хабарлады облыстық полиция департаментінің баспасөз қызметі.
Күдіктіге қатысты ҚР Қылмыстық Кодекстің 297-бабы және 256, 174-баптарымен сотқа дейінгі тергеп-тексеру басталды. Теріс діни ағымның өкілі қамауға алынды.