ОРАЛ. ҚазАқпарат - Шыңғырлау аудандық соты ҚР ҚК 362-бабы 4-бөлігінің 1-тармағы бойынша айып тағылған аудандық ішкі істер бөлімінің учаскелік полиция инспекторының бұрынғы көмекшісі Ж.Сұлтанғалиев пен техник-криминалист Д.Парадаға қатысты үкім шығарды.
БҚО прокуратурасының баспасөз қызметінен түскен мәліметке қарағанда, жәбірленушінің арызы негізінде ұрып-соғу фактісі бойынша аудан прокуратурасы аталған қызметкерлердің үстінен қылмыстық іс қозғады. Атап айтқанда, Сұлтанғалиев пен Парада қызметтік өкілеттіліктерін асыра пайдаланып, әкімшілік айыппұлды төлемегені үшін аталған тұрғынды соққыға жыққан. Сөйтіп төменгі жақ сүйегін сындырып, денсаулығына орташа дәрежеде зақым келтірген.
Алдын ала тергеу барысында күдіктілер кінәсін мойындап, процессуалдық келісімдер жасалған.
Сот үкімімен сотталушылардың әрқайсысына ҚР ҚК 63-бабы 3-бөлігі қолданылып, шартты түрде бес жылға пробациялық бақылау орнатылып, 5 жылға бас бостандығынан айыру жазасы белгіленді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).