ОРАЛ. Қазанның 1-і. ҚазАқпарат /Ғайсағали Ералы/ - «Азаттың» Зеленов ауданындағы 650 мүшесі партия қатарынан шығады.
Бұл туралы «Азат» ҚДП төрағасының орынбасары Петр Своиктің Оралдағы әріптестерімен кездесуі кезінде аталмыш партияның Зеленов аудандық ұйымының жетекшісі Анатолий Авдеев мәлімдеді, деп хабарлайды ҚазАқпарат тілшісі.
А.Авдеевтің айтуынша, бұл партиядан оның көңілі қатты қалған. Оның пікірінше, аймақтарға ешқандай көңіл бөлінбейді, насихат жұмысы мен газет таратуға бөлінген қаржыны әркім өз қалтасына басуды ойлайтындар қатарында зеленовтықтардың қалғысы келмейді.
Жалпы, аталмыш жиында П.Своиктің бір партия, бір тудың астына бірігу туралы ойын жергілікті оппозиция өкілдері қолдай қойған жоқ. Мінбеге шыққан Қазақстанның коммунистік партиясы, социал-демократтар және басқа да оппозициялық ұйымдар өкілдері көп жағдайда мүдде бір болғанымен, әр партияның қоғамда атқаратын рөлі әртүрлі екендігін атап көрсетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).