ОРАЛ. ҚазАқпарат - Батыс Қазақстан облысында биылғы 1 қазандағы есеп бойынша 9924 адам жұмысқа орналасып, 8320 жаңа жұмыс орны ашылды.
БҚО жұмыспен қамтуды үйлестіру және әлеуметтік бағдарламалар басқармасының басшысы Кемел Сәдбековтің сөзіне қарағанда, соның ішінде 5099-ы жұмыспен қамту бағдарламасы арқылы еңбек орнын тапты. Қоғамдық жұмысқа 6156 адам жіберілсе, соның 83,6 пайызы ауылдық жерде тұрады. Әлеуметтік жұмыс орындарына 2148 адам жолданса, соның 1623-і жұмыспен қамту бағдарламасы арқылы барды. Жастар тәжірибесіне 1382 түлек (1191-і жұмыспен қамту бағдарламасы арқылы) жолданды. Кадрларды даярлау, қайта даярлау, біліктілігін арттыруға 1245 адам (403-і жұмыспен қамту бағдарламасы арқылы) жіберілді.
Жыл басынан бері бос жұмыс орындарының 43 жәрмеңкесі өткізіліп, соның нәтижесінде 1239 адам жұмыс тапты, 69-ы кәсіптік оқуға жолданды.
Өңірде тоғыз айда жұмыспен қамту органдарына 16282 адам жолығып, жұмыссыз ретінде 2518-і тіркелген. Бұл облыстағы экономикалық тұрғыдан белсенді халықтың 0,5 пайызын құрайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).