ОРАЛ. Сәуірдің 26-сы. ҚазАқпарат /Елжан Ералы/ - Батыс Қазақстан облысы Сырым ауданы орталығындағы Ж.Досмұхамедов атындағы Өлеңті орта мектебінде облыс жастары Кеңес Одағының Батыры Бауыржан Момышұлының 100 жылдығын атап өтті,
деп хабарлайды ҚазАқпарат тілшісі.
«Сырым жастары» жастар қоғамдық бірлестігі мен «Жас Отан» жастар қанатының аудандық бөлімшесі ұйымдастырған «Өрлікпен өрілген өмір» атты облыстық ғылыми-тәжірибелік конференция барысында үш ай бойы жинақталған жастар жұмыстарының қорытындылары шығарылды. «Бауыржан Момышұлы тұлғасының әдебиетте бейнеленуі», «Бауыржан Момышұлы - елшіл ер, ұлтжанды тұлға, қыран қайраткер», «Бауыржан Момышұлының жазушылық қыры» аталымдары бойынша үздіктер анықталып, олар дипломдармен, ақшалай сыйлықтармен марапатталды.
Самара қаласынан келген Зоя Әсімова майдан жылдарында Қазақстанда құрылған №100 және 101-бригада сарбаздарының тағдырына қатысты үш жылдан бері жүргізіп келе жатқан жұмысының нәтижесімен, алдағы жоспарларымен таныстырды. Бауыржан Момышұлы туралы «Аңыз бен ақиқат» атты роман жазған Әзілхан Нұршайықовпен ұялы телефонмен байланысқа шығу арқылы майдангер жазушы жастарға игі тілегін жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).