ОРАЛ. 14 маусым. ҚазАқпарат - 14 маусым күні Ақжайық ауданы Базаршолан ауылында қазақтың ХVІІІ ғасырдағы қол бастаған батыры Байбарақтың 300 жылдығына арналған шаралар басталды.
Асты ұйымдастырып отырған «Алаша Байбарақ» қорының директоры, белгілі әнші Сағадат Рахметжановтың айтуынша, тойға келгендер 30 шақырымға аламан бәйге, ошақ бәйге (21 шақырым), қазақ күресі (түйе балуан) және басқа мәдени-спорттық шараларды тамашалайды. Бәйге, күрес жеңімпаздарына «Джип» және басқа автокөліктер, ақшалай-заттай сыйлықтар тігіліп отыр.
Байбарақ - Алаша руының ұранына айналған батыр. Өткен жылы Базаршолан ауылының күншығыс бетіндегі Байбарақ қорымында батырдың бейітіне күмбезді кесене орнатылса, биыл осы тойға орай Алматыдағы республикалық «Арыс» баспасынан арнайы жинақ шығарылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).