ОРАЛ. 2 қазан. ҚазАқпарат - Батыс Қазақстан облысында 1 қазан күні «Мейірбандық күндері» қайырымдылық айлығы басталды.
Кеше Қарттар күніне орай көптеген ұйымдар мен мекемелерде ардагерлерге құрмет көрсетілді. «Батыс Қазақстан электр тораптарын тарату компаниясы» АҚ өндіріс ардагерлеріне 3 мың теңгеден материалдық жәрдем берді. Ал облыстық кардиологиялық орталықта зейнеткерлер мен осы жасқа таяп қалғандар үшін салтанатты кеш ұйымдастырылды. Әрбір сала ардагерінің ортақ іске қосқан үлесі атап өтілді. Бір тобына облыстық денсаулық сақтау басқармасының грамотасы мен алғысхаттары табыс етілді. Ақшалай сыйлықтар беріліп, дастархан жайылды.
Батыс Қазақстан облыстық клиникалық ауруханасында елу ардагерге тарту-таралғы тапсырылды. Олардың арасында еңбек етіп жүргендері де бар. Айталық, белгілі эндокринолог Ефим Мирский жасы келсе де, қажырлы жұмыс жасауда.
Өңірде қайырымдылық шаралары ай бойы жалғасады. Бұдан жеке мекемелер, үкіметтік емес ұйымдар, кәсіпкерлер де тыс қалмақ емес.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).