ОРАЛ. 24 қазан. ҚазАқпарат - Батыс Қазақстан облысында көліктік-логистикалық орталығын құру көзделіп отыр.
Облыс әкімі Нұрлан Ноғаевтың сөзіне қарағанда, бұл жоба Көлік және коммуникация министрлігімен келісілген. Ресейдің бес бірдей аймағымен шектесетін өңірдің орналасу ерекшелігін, оның Еуропа мен Азияны жалғастыратынын ескере отырып, аталмыш орталық арқылы тауарларды таратуға болады.
Тағы бір жоба, Украинадан, Ресейдің оңтүстігінен Волгоград арқылы келетін жолды анағұрлым қысқарту үшін Жәнібек, Қазталов, Чапаев, одан Жайық өзені арқылы Жымпитыға дейін жол тартып, оны Шымкент-Самара күре жолына қосу ойластырылуда. Аталмыш министрліктің автожолды дамытудың 2020 жылға дейінгі бағдарламасына енген бұл жолды «Батыс Еуропа - Батыс Қытай» жобасының бір тармағы деп есептеуге болады. Бұл жолмен Жымпиты арқылы Ақтөбеге де тіке шығуға болады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).