ОРАЛ. 15 қараша. ҚазАқпарат /Елжан Ералы/ - Батыс Қазақстан облыстық педагог кадрлар біліктілігін арттыру және қайта даярлау институты «Мектептің үздік басшысы» байқауын өткізді.
Институттың басшы кадрлар әдіскері Балзия Тұржанованың хабарлағанындай, соңғы бес жылда бір рет ұйымдастырылып отырған байқаудың бастапқы кезеңі тамыз-қыркүйек айларында қала мен аудандарда өткізілген болатын. Қорытынды сайысқа барлығы он үміткер қатысып, үш түрлі сынақтан өтті. Тестілеуден бақтарын сынап, өз мектептерінің жетістіктерін көрсеткен директорлар шеберлік сабақтарын да берді.
Байқау қорытындысында Орал қаласындағы №44 орта мектеп директоры Ақжарқын Темірханова бас жүлдені жеңіп алды. Тасқала ауданы С.Жақсығұлов атындағы мектеп басшысы Ұлмекен Сараева - бірінші, Теректі ауданы Ақжайық орта мектебінен Светлана Шүкірова - екінші, Бөкей ордасы ауданы Б.Жәнекешев атындағы мектеп директоры Шынар Зұлқашева үшінші орынды еншіледі. Сондай-ақ ұстаз-басшылар түрлі аталымдар бойынша да марапатталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).