ОРАЛ. 16 мамыр. ҚазАқпарат - Орал қаласындағы «Қазармапром» АҚ-ның құю цехында тұрғындар тапсырған 600-ден астам қару-жарақ жойылды.
Тұрғындардың жеке иелігіндегі қару-жарақты жинап, жою шарасы бұдан төрт жыл бұрын қолға алынса, биыл 1 ақпан мен 1 сәуір аралығында қайта жалғасты.
Облыстық ІІД лицензиялық рұқсат беру жүйесінің аға инспекторы, полиция майоры Рашид Фазыловтың мәлімдеуінше, биылғы шараны өткізу үшін 12 миллион теңгеден астам қаржы бөлініп, соның 6 миллионы тіркелмеген қару-жарақтарын өз еркімен тапсырған жеке тұлғаларға берілді. Бөлінген қаржының қалған бөлігі мамыр және маусым айында төленбек.
2008 жылдан бастап өткізіліп жүрген бұл акцияға қатысушылар саны жыл сайын артып келеді. Мысалы, биыл екі ай ішінде тапсырылған қару-жарақ саны 2008 жылы 12 ай бойына жиналған қару көлеміне (700-дей) жуықтаған. Аталмыш шараға ауыл адамдары белсендірек қатысқан. 600-ден астам қатысушының 146-сы қалалықтар болса, қалғаны - ауыл тұрғындары.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).