ОРАЛ. 6 мамыр. ҚазАқпарат - Батыс Қазақстан облысында Ұлы Отан соғысы ардагерлерімен кездесулер өткізіліп, құрмет көрсетілуде.
Сондай жүздесулердің бірін облыстық мүгедектер қоғамы ұйымдастырды. Онда майдангерлер жорық жолдарын еске алып, жас ұрпақты отаншылдық рухында тәрбиелеу бағытындағы өз ойларын ортаға салды.
Облыстық мүгедектер қоғамының төрағасы Жұмажан Қожжановтың айтуынша, ардагерлердің өмірлік тәжірибесі, майдандағы достықтары - кейінгі жастарға үлгі. Мұндай кездесулерді, әсіресе, мектептерде, оқу орындарында ұйымдастырудың маңызы зор.
Бұл күндері мекеме-кәсіпорындар, ұйымдар да өз майдангерлеріне құрмет көрсетіп, тарту-таралғыларын ұсынады. Оларға жергілікті билік орындары тарапынан қаржылай сыйлық беріледі. Орал қалалық жұмыспен қамту және әлеуметтік бағдарламалар бөлімінің мәліметіне қарағанда, Оралда тұратын Ұлы Отан соғысына қатысушылар мен мүгедектеріне жергілікті бюджеттен 2011 жылғы мамырдағыдай 30 мың теңгеден төленеді. Бұл төлемақыны 344 майдангер алмақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).