ОРАЛ. ҚазАқпарат - Батысқазақстандық балуан, БҚО ішкі істер департаментінің қызметкері Екатерина Ларионова Красноярск қаласында ерлер мен әйелдер арасында еркін күрестен ХХVІІ халықаралық Иван Ярыгин турнирінде қола жүлдені жеңіп алды.
Департаменттің баспасөз қызметінен түскен мәліметке қарағанда, аталмыш додаға әлемнің алпыс шақты елінен мықты балуандар қатысқан. Е.Ларионова 63 келіге дейінгі салмақта үшінші орынға көтерілді.
Бұл - Екатеринаның биылғы жыл басынан бергі екінші жүлдесі. Мұның алдында Тараз қаласында өткен Қазақстан чемпионатында Е.Ларионова алтын медальді жеңіп алған болатын.
Айта кетейік, әйелдер күресінен 2014 жылғы әлем чемпионатының қола жүлдегері, халықаралық дәрежедегі спорт шебері Е.Ларионованың биылғы басты мақсаты - Рио-де-Жанейро олимпиадасы жолдамасын иеленіп, сонда сәтті өнер көрсету.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).