ОРАЛ. ҚазАқпарат - Батысқазақстандық тоғызқұмалақшылар Әсет Қайыржанов пен Жарасхан Сағынбаев алдағы жылы Қытайда өтетін ІІІ Азия чемпионатына Қазақстан құрамасы сапында қатысады.
Тоғызқұмалақтан БҚО құрамасының аға бапкері Дәулет Әбідкәрімовтің айтуынша, олар бұл жолдаманы жуырда Ақтау қаласында жастар арасында тоғызқұмалақтың классикалық және блиц түрінен өткен ел чемпионатының қорытындысына сәйкес иеленді. Жас ерекшеліктеріне қарай 16, 18 және 20 жастағылар арасында ұйымдастырылған жарысқа еліміздің он төрт облысы мен Астана, Алматы қалаларынан 200-ге жуық спортшы қатысып, бақ сынады.
Классикадан 18 жастағылар арасынан Ж.Сағынбаев жеңімпаз атанса, Ә.Қайыржанов үшінші орынды иеленді. Блицтен Әсет бірінші, Жарасхан үшінші жүлдені еншіледі. Енді олар құрлықтық додаға дайындалмақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).