ОРАЛ. 13 наурыз. ҚазАқпарат - 13 наурыз күні Германиядан келген профессор Хенинг Хойман БҚО клиникалық ауруханасында өзінің жетекшілігімен ота жасауға қатысқан үш құлақ-мұрын дәрігері мен 11 орта буын қызметкеріне сертификат тапсырды.
Облыстық денсаулық сақтау басқармасының баспасөз қызметінен Флюра Саматованың хабарлағанындай, Штуртгарттан аталмыш профессор 2011 жылдан бері осымен төртінші рет келіп отыр. Содан бері темпанопластика бойынша 148 ота, 46 протез жасалған. Сондай-ақ 28 бала қайта есту қабілетіне ие болды.
Неміс профессорынан батысқазақстандық отохирургтер Расул Қамкиев, Динара Молдағалиева, Асхат Қадырғалиев дәріс алып, өз тәжірибелерін жетілдіріп келеді.
Бұл жолы 17 наурызға дейін болатын Х.Хойман 64 ота жасамақшы. Ол бұдан кейін де Оралға әлі де бір-екі рет келіп, батысқазақстандықтарға қолұшын бермекші. Ар жағында түрлі оталарды жергілікті дәрігерлердің өздері жасайтын болады. Бұған толық жағдай бар.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).