ОРАЛ. 13 қараша. ҚазАқпарат - М.Өтемісұлы атындағы Батыс Қазақстан мемлекеттік университетінде «жасотандықтар» жас кәсіпкерлермен және студенттермен кездесіп, «Жас Отан» жастар қанатының 2020 жылға дейінгі стратегиясы жобасын талқылады.
Жиынға қатысушылар, әсіресе, жастар кәсіпкерлігін дамыту мәселелеріне баса назар аударды. Бұл - 16 қараша күні Астанада өтетін «Жас Отан» жастар қанаты ІІ съезінде қабылданбақшы стратегия жобасындағы басым бағыттардың бірі.
«Нұр Отан» ХДП БҚО филиалы «Жас Отан» жастар қанатының жобалар бойынша менеджері Дария Жүсіпқалиеваның айтуынша, жас кәсіпкерлер ел экономикасын жаңа белеске көтеруге қабілетті қуатты күш болып табылады. Сондықтан бұл мәселенің мемлекеттік маңызы зор. Стратегия жобасына сәйкес өз кәсібін бастағысы келетін жастарға нақты көмек көрсетуге «Жас Отан» жастар қанаты ықпал ететін болады. Жаңа жобалар бойынша кеңес беретін орталықтар ашылып, кәсіпкерлік қызмет дағдысын қалыптастыру бағытында шаралар қолға алынбақ. Соның ішінде ауыл жастарына шағын несие беру назарда болмақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).