Байқоңырдан Халықаралық ғарыш станциясына жүк жіберу 11 қыркүйекке жоспарланған

АСТАНА. KAZINFORM — «Байқоңыр» ғарыш айлағында «Прогресс МС-32» жүк тасымалдау кемесін Халықаралық ғарыш станциясына (ХҒС) ұшыруға дайындық жұмыстары жүріп жатыр, деп хабарлайды Kazinform тілшісі.

Ұшу алдындағы дайындық жоспарына сәйкес «Энергия» корпорациясының мамандары «Прогресс МС-32» кемесіне жанармай құйды.

— Ғарыш кемесін толтыру — цистерналардың салмағын теңестіруге болатын соңғы кезең, бұл ұшу кезінде жүк көлігі теңгерімінің дәлдігін арттырады, — дейді мамандар.

Жанармай құйылғаннан кейін жүк көлігі одан әрі дайындық үшін 254-ші ғарыш айлағы учаскесіне қайтарылды. Ұшырылымға үш күн қалғанда, 8 қыркүйекте «Прогресс МС-32» жүк көлігі «Союз 2.1а» зымыран-тасымалдағышымен «Байқоңыр» ғарыш айлағы учаскесінің № 31 ұшыру алаңына орнатылады.

93-ші ХҒС жеткізу миссиясының бағдарламасы бойынша «Прогресс МС-32» жүк кемесі мен «Союз-2.1а» зымыран тасымалдағышын ұшыру 2025 жылдың 11 қыркүйегіне, Астана уақытымен сағат 20:49–ға жоспарланған.

Алдағы ұшырылым «Прогресс» сериялы ғарыш аппаратының биылғы 185-ші және «Байқоңыр» ғарыш айлағынан бесінші ұшуы болады.

Байқоңырдан бұған дейінгі ұшыру 2025 жылдың 20 тамызында жүзеге асырылды. Онда № 2 Бион-М биологиялық зертханасы тірі тіршілік иелерімен бірге ғарышқа жіберілген болатын.

Туризм және спорт вице-министрі Ержан Еркінбаев Байқоңырдағы әрбір зымыран ұшырылымына 2 мыңнан астам турист келетінін айтқан еді.