АСТАНА. KAZINFORM – Қазақстандық теннисші, әлемнің 206-ракеткасы Бейбіт Жұқаев Канкун (Мексика) челленджер турниріне жолдама алды.
Қазақстандық теннисші іріктеу сайыстарының финалында дүниежүзілік рейтингіде 360-орында тұрған испаниялық Пабло Льямас Руиспен сынға түсті.
Бірінші партияда Бейбіт тай-брейкте табандылық танытты – 7:6 (7:4). Екінші сетті 6:4 есебімен тәмамдады.
Бір сағат 42 минутқа созылған бәсекеде Жұқаев 7 эйспен бірге 3 брейк-пойнттан шашау шығарған жоқ. Руис 11 эйс, 2 брейкпен (5 брейк-пойнт) көзге түсті.
Осылайша, негізгі жарысқа өткен Бейбіт Жұқаев алғашқы айналымда әлемнің 97-ракеткасы, аустралиялық Тристан Скулкейтпен шеберлік байқасады.
Еске сала кетейік, бұдан бұрын Елена Рыбакинаның Цинциннати турнирінің төртінші айналымына жолдама алғанын жазған едік.
Сондай-ақ Болгариядағы турнирде Денис Евсеев испаниялық теннисшіні ойсырата ұтты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).