***
«Қазақ қоғамында әйел айрықша маңызға ие. Олардың отбасы берекесінің ұйытқысы, ұрпақ жалғастырушы және тәрбиелеуші ретіндегі табиғи рөліне қазір жаңа міндеттер жүктелді. Дұрысын айтқанда, қыз-келіншектерге көшбасшылық, белсенділік, жетекшілік және табыскерлік пен іскерлік секілді қырларын таныту үшін жаңа мүмкіндіктерге жол ашылды», - деп жазады «Егемен Қазақстан» газеті бүгінгі нөміріндегі «Әйел әкімдер әлеуетті болуы үшін» деген тақырыптағы мақаласында. Басылымның жазуынша, Гендерлік саясатты дамыту бағытында ауқымды жұмыстар атқарып жүрген Қазақстан Республикасы Президентi жанындағы Әйелдер iстерi және отбасылық-демографиялық саясат жөніндегі ұлттық комиссия Ақтау қаласында Маңғыстау облысы әкімдігімен бірге «Ауылдық аумақтарды әлеуметтік-экономикалық дамыту: гендерлік аспект» тақырыбында өңірлік семинар-кеңес өткізді. Жиында гендерлік саясаттың елімізде табысты жүзеге асырылу үрдісіне тоқталған аймақ басшысы А.Айдарбаев мұнайлы өлкедегі қыз-келіншектердің белсенділігі мен мемлекеттік қызметтегі үлес салмағын саралады. «Маңғыстауда 286 мың әйел тұрады, бұл - тұрғындардың 51 пайызы. Облыс экономикасында олардың үлесі 47 пайызды құрайды. Әйелдер өндірістің барлық салаларында еңбек етуде, бірақ денсаулық сақтау, білім беру, әлеуметтік қызмет секілді дәстүрлі «әйелдік» салаларда олардың саны басым болып келеді. Статистикаға жүгінсек, бүгінгі таңда барлық педагогтардың - 70, медицина қызметкерлерінің 80 пайызы әйелдер болып табылады. Барлық бюджеттік сала қызметкерлерінің 60 пайызы әйелдердің үлесінде. 303 әйел облыстың әртүрлі мемлекеттік мекемелерін басқаруда. 7 мың шағын және орта кәсіпорынның 2 мыңға жуығын әйелдер басқарып отыр. Өңірдің әлеуметтік маңызды мәселелерін шешуге - отбасы, әйелдер мен балалар мүдделерін қорғау салаларында әйел әріптестер жетекшілік ететін 15 үкіметтік емес ұйым белсенді қатысуда», - деді әкім.
Осы басылымның жазуынша, кеше Астанада өткен Орталық Азия аймақтық экономикалық ынтымақтастық бағдарламасының 12-ші министрлер конференциясына Қазақстан Премьер-Министрі Серік Ахметов қатысты. Жыл сайынғы мұндай министрлер конференциясы Орталық Азия аймақтық экономикалық ынтымақтастығының саясаты мен оның бағдарламасының стратегиялық бағыттарын айқындайды. Ал бағдарлама жалпы инфрақұрылымдар бойынша аймақтық жобаларды қаржыландыруға, аралық қызметті дамытудың негізгі міндеттерін шешуге арналған. Басылымның жазуынша, Премьер-Министр соңғы жеті жылда Қазақстан экономикасына 155 млрд. доллардан астам шетелдік тікелей инвестициялар тартылғандығын айтып өтті. Сонымен қатар, С.Ахметов Қазақстанның Орталық Азия аймақтық экономикалық ынтымақтастығы бағдарламасына қатысушы ретінде интеграцияның қажеттілігіне көз жеткізгенін, сондықтан тауарлар, қызметтер және жұмыс күштерінің еркін қимылын қамтамасыз ету қағидаларына негізделген Біртұтас экономикалық кеңістікті қалыптастыру үрдісіне белсенді түрде қатысатынын атап көрсетті. «Қазақстан Кеден одағы мен Біртұтас экономикалық кеңістікке мүше елдермен бірлесіп, басқа елдердегі сауда әріптестерімен ынтымақтастықты кеңейтуге, өзара инвестициялар көлемін ұлғайту және БЭК ортақ рыногында қалыптасқан әлеуетті пайдалануға мүдделі», - деді С.Ахметов. Мақала «Азия аймағы - ынтымақтастық алаңы» деген тақырыппен берілген.
***
«Қайрат Мәми қазақстандық соттардың ағымдағы жылдың 9 айы бойынша жұмыс қорытындысына қысқаша тоқталып, сот жүйесіндегі кезек күттірмей шешуді талап ететін өзекті мәселелерге баса назар аударды», - деп жазады «Айқын» газеті бүгінгі санындағы «Жергілікті соттардың жұмысын сынады» деген тақырыптағы мақаласында. Басылымның жазуынша, Жоғарғы Сот Төрағасы Қайрат Мәми бейнеконференция байланысы арқылы облыстық және оған теңестірілген соттардың төрағаларымен және судьяларымен, судья әдебі жөніндегі өңірлік комиссиялардың жетекшілерімен, облыс орталықтары мен қала маңында орналасқан аудандық соттардың төрағаларымен жұмыс кеңесін өткізді. Қайрат Мәми қазақстандық соттардың ағымдағы жылдың 9 айы бойынша жұмыс қорытындысына қысқаша тоқталып, сот жүйесіндегі кезек күттірмей шешуді талап ететін өзекті мәселелерге баса назар аударды. Мысалы, ақтау үкімдері санының көбеюімен бірге елде күші жойылған және өзгерген сот актілерінің саны үздіксіз өсуде. Республика бойынша сот актілерінің орташа 9,5 пайызына шағым жасалып, әрбір екінші сот шешімінің күші жойылады. Тек ағымдағы жылдың 9 айында аудандық соттардың 1796 адамға қатысты үкімдері қате деп танылды. Бұл былтырғы жылға қарағанда 2 пайызға жоғары. Жергілікті соттардың 6 мыңға жуық шешімдерінің күші жойылған. Қадағалау және кассациялық сатыдағы соттар Алматы қаласы соттарының 45 шешімін, Астана қаласы соттарының 18 шешімін және Шығыс Қазақстан облысы соттарының 16 шешімін қалпына келтірді.
Қазақстандықтар ішімдік ішуден әлем бойынша 34-орында. Халқының саны небәрі 17 млн-ды құрайтын елімізде сыра қайнататын орындарды қоспағанның өзінде алкоголь өнімдерін өндіретін зауыттардың өзі 205-ке жеткен. Зерттеушілердің мәліметіне қарағанда «ішкіш елдердің» 30-дығына еніп кетуіміздің бір себебі, арақ-шараптың оңай қолжетімділігінде жатыр. Сонымен бірге шайтан судың нарығындағы астыртын тасымал мен сатылымның өзі жалпы сауданың 30 пайызына дейін өсіп кеткен. Бұл жайында «Айқын» газетінің бүгінгі санындағы «Биліктелгілердің өзі «барондарға» бас шұлғып жүр ме?» деген тақырыптағы мақалада баяндалған. Басылымның жазуынша, аталған саладағы ең күрделі жайттың бірі-көлеңкелі сауда-саттық. Арақ-шарапты астыртын дайындап сөрелерді жайнатып тастайтындардың күрт өсуі, бөтелке бизнесінде мол табыстың бар екендігін білдірсе керек. 2011-12 жылдар аралығында жалған өнім өндірумен шұғылданатындардың соңына түскен құзырлы органдар құқық бұзушылыққа жол берген 31 өндірушінің лицензиясын жойып, 15-ін уақытша тоқтатқан. Оларға жалпы сомасы 1,9 млрд теңгеге айыппұл салыпты. Ағымдағы тоғыз айда 891 мың дана бөтелке айналымнан алынып, оған иелік етушілерге 38 млн теңге айыппұл кесіп, 11 лицензияны шектепті. Заңсыз спирт саудасы АҚШ пен Швейцарияда 8-10 пайыз, экономикасы өтпелі елдерде 30-35 пайызды құраса, біздегі көрсеткіш 25 пайыздың төңірегінде.