«Нағыз азаматтар, осы әрекеттері үшін жеке құттықтауымды жеткізгім келеді. Өте жауапты әрі жақсы шешім!»,-деді Сағадиев Парламент палаталарының бірлескен отырысынан кейін «ҚазАқпарат» ХАА тілшісі сауалына орай жауабында.
Жақында Түпқараған ауданы Ақшұқыр ауылындағы мектеп-лицейдің 45 түлегі Ораза айында мектеп бітіру кешінен бас тартып, өздері жинаған 400 мың теңге қаражатты ауыр науқасқа шалдыққан 11 жасар Әмина Тәуірбаеваға емделу үшін тапсырды. 2015 жылы бойында қауіпті дерт бар екендігі анықталған Әмина уақыт өткізбей емделгенмен, соңғы кездері оның көру қабілеті күрт нашарлап кеткен. Үйінен білім алатын қызды туыстары мен ата-аналары қыркүйекке дейін Ресейге апарып, дәрігерлерге қаратып келуге бел буып отыр. Әминаның әжесі Мәрияш қайырымды жастарға ризашылығын білдіріп, үлкен өмірге басқан қадамдарына сәттілік тіледі.