АСТАНА. KAZINFORM — Аустралияның Брисбен қаласында теннистен Билли Джин Кинг кубогының іріктеу турнирінде Қазақстан мен Колумбия құрамалары кездесіп жатыр.
Бірінші болып кортқа Қазақстанның екінші, әлемнің 23-ракеткасы Юлия Путинцева мен дүниежүзілік рейтингіде 804-орында тұрған 18 жастағы Валентина Медиорреал Ариас шықты.
Қазақстандық теннисші қарсыласына дес бермей, 6:0, 6:1 есебімен ойсырата ұтты.
Небәрі 36 минутқа созылған бәсеке барысында Путинцева 1 эйспен бірге 7 брейк-пойнттың алтауын пайдаланды. Ариас 1 брейкпен шектелді.
Осылайша, Ю.Путинцева Қазақстанды алға шығарды – 1:0.
Енді Елена Рыбакина мен Юлиана Лисарасо шеберлік байқасады.
Еске сала кетейік, бұдан бұрын Билли Джин Кинг кубогында Қазақстан құрамасының Аустралияны ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).