ОРАЛ. 25 қазан. ҚазАқпарат /Елжан Ералы/ - Футболдан Қазақстан чемпионаты бірінші лигасының ойындары мәреге жетіп, Оралдың «Ақжайығы» төртінші орынды қанағат тұтты.
Біріншілік қорытындысында Қаскелеңнің «Сұңқары» 77 ұпаймен бас жүлдені жеңіп алса, қоржынында 69 ұпайы бар Көкшетаудың «Оқжетпесі» екінші орынды иеленді. Сөйтіп аталмыш қос команда премьер-лига жолдамасын еншіледі. Маусымды 56 ұпаймен аяқтаған «Ақжайық» соңғы екі турдың ойындарын нәтижелі өткізіп, 59 ұпай жинаған Өтеген батыр ауылының «Іле-Сәулетінен» де қалып қойды.
Премьер-лигаға қайта оралуды мақсат тұтқан оралдықтар бұл межеге жете алмады. Олар, әсіресе, бірінші айналым ойындарын сүреңсіз өткізді. Кейін бас бапкерін ауыстырып, бірқатар ойыншылармен толықтырылғанымен, көшбасшы командалармен ұпай айырмашылығын қысқарта алмады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).