Астана форумының басты ұстанымдарының бірі - әлемдік валюта саясатының трансформациясына қол жеткізу. Бұл жолы қазақ Президентінің аузынан ықтимал криптовалюта туралы, оның демократиялық сипатта болуы туралы сөз шықты. Сондай-ақ, жаһанның жаңарған экономикасы алдымен экологияға залал келтірмеуі керек. Бұл жолы да жоғары деңгейдегі мінберлерден жаһандық жылыну, парникті газдар туралы әңгіме қозғалды. Ал осындай бастамалардың басиесі болып отырған қазақ елінің қазіргі кезеңдегі қолжеткен жетістіктері қазіргі мәртебесіне қаншалықты дәрежеде сәйкеседі, дегенге келейік.
Алдымен айтарымыз, ЭКСПО-2017 деңгейінде көтеріліп отырған баламалы энергия, экология мәселесіне келсек, біздің елде осы кездің өзінде экологиялық таза негізде жұмыс істеп отырған 50 ірі кәсіпорын бар. Оған қоса Қазақстан Республикасы басқа мемлекеттер дағдарыс әсерінен кібіртіктеп адымын аша алмай қалған тұста, яғни, бірінші тоқсанның қорытындысы бойынша 3 пайыздық экономикалық өсімге қол жеткізіп отыр.
Сондықтан қарқынды осы бағытта ұстап, үстіміздегі жылдың аяғына дейін өсім мөлшерін арттыра беру керек. Сарапшылар біздің елдің бұл жетістігін Президент Назарбаев белгілеген үшінші жаңғыру бағдарламасымен байланыстырады. Әлбетте, бұл бағдарлама - ұзақ жылдар еншісіне ойластырылған шара. Ендігі мәселе оның лайықты деңгейде жүзеге асырылуында.
Қазір алға қойған міндеттерді одан әрі жүзеге асыру жоспарлары жасалынуда. Рас, арнайы қаржыландыруды талап ететін жобалар да бар. Дегенмен, үшінші жаңғыруға сәйкес межеленген жоспарлардың көбі республикалық бюджеттен қосымша қаржы талап етпейді.
Дегенмен, жалпақ жаһанды жайлаған дағдарыстың бізді де айналып өтпейтіні белгілі жәйт. Басты әңгіме басында Қазақстан Президенті тұрған Еуразиялық Экономикалық Одақтың қаржылық-экономикалық жағдайына байланысты.
Екінші тоқсанның, яғни, жарты жылдықтың қорытындысы әзірге жасалынған жоқ. Ал жылдың бірінші тоқсанында еуразиялық елдер арасындағы сыртқы сауда 37, өзара сауда 38 пайызға өсіпті. Ал Қазақстанның экономикалық одақтағы әріптестерімен саудасы 56,5, Ресеймен және Беларусьпен арадағы сауда 50, Қырғызстанмен 41 пайызға өскен. Дегенмен, экономикалық одақтағы елдердің өзара тауар айналымында кедергілер де жоқ емес.
Сондай-ақ, Қазақстан Республикасының алдында алыс шет елдердегі халықаралық әріптестермен сауда-экономикалық қатынас жүргізудің жауапты міндеті тұр. Әсіресе, Иранмен, Қытаймен, Үндістанмен, Сингапурмен, Сириямен, Израильмен, басқа да бізбен сауда байланысына құлықты елдермен сауда-саттықты өркендету ләзім.
Еліміздің алдында тұрған келесі бір міндет - технологиялық жаңғырудың жол картасын жасау, қазіргі кезде әкімшіліктер, ірі холдингтер мен компания басшылары бірлесіп соның дайындығын жүргізуде. Әрі осы шаралардың бәрі қазіргі кезде бүкіл әлемнің назарын аударып, Астанада өтіп жатқан ЭКСПО-2017 мен таяуда аяқталған Астана форумының талаптарына толық сәйкес келеді.
Қазіргі таңның ел ішіндегі ең басты міндеттері - «Болашаққа көзқарас: қоғамдық сананы жаңғырту» бағдарламасында қойылған міндеттерді жүзеге асыру.
Ол туралы Астана форумында Елбасы Нұрсұлтан Назарбаев:
- Біз көнерген өлшемдерді жалғастыруды тоқтатуға әзірміз. Өйткені, біздің ғасырымыз - мүлдем жаңа дәуір. Сондықтан біз үшін өткеннің ең құнды нәрселерінің ғана қалуы маңызды. Ал тиімсіз нәрсенің бәрі өткенмен кетуге тиісті. Біздің қоғам көнерген ескілік пен жаңа үрдістердің айырмасын жақсы біледі. Ендігі сенім сонда, - деп атап көрсетті.