ОРАЛ. 25 наурыз. ҚазАқпарат /Елжан Ералы/ - Бүгінгі таңда Орал қаласындағы қоныс колониясында 134, түзеу мекемесінде 871, тергеу изоляторында 221 және қылмыстық атқару инспекциясында 886 сотталған адам жазасын өтеуде.
Қылмыстық атқару жүйесі комитеті БҚО бойынша департаментінің аға маманы Даниял Ғабдушевтің айтуынша, «Қылмыстық заңнаманы одан әрі ізгілендіру және қылмыстық процестегі заңдылық кепілдіктерін одан әрі күшейту мәселелері бойынша ҚР кейбір заң актілеріне өзгерістер мен толықтырулар енгізу туралы» заң қабылданғалы облыстың түзеу мекемелерінде жазасын өтеп жатқандар арасынан 101 адамның ісі қайта қаралды. Нәтижесінде 82 адам бостандыққа шығып, 19 адамның жазасы төмендетілді және бас бостандығынан айыру жазасы алынып тасталды.
- Департаменттен сот органдарына барлығы 158 материал жолданды. Қазір жаңа заң бойынша істері қайта қаралатын сотталғандарды бостандықтағы өмірге бейімдеп жатырмыз. Қалалық жұмыспен қамту және әлеуметтік бағдарламалар бөлімінен алынған бос жұмыс орындары тізімі бойынша жазасын өтеп шыққандарды еңбекке жұмылдыру, баспана мәселесін шешу жолдары қарастырылуда, - дейді Даниял Ғабдушев.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).