ОРАЛ. 19 сәуір. ҚазАқпарат - Шыңғырлау ауданы прокуратурасына қылмыстық жауапкершілікке тартылған адамның заңсыз қызметке орналасқаны жөнінде хабар түседі.
Облыстық прокуратураның баспасөз қызметінен түскен мәліметке қарағанда, тексеріс барысында «Бөбек» балабақшасының меңгерушісі Г.Тұрланованың 2012 жылғы 29 маусымдағы бұйрығымен Э.Көбекованың тәрбиеші көмекшісі ретінде қызметке алынғаны анықталды. Шыңғырлау аудандық сотының 2010 жылғы 15 маусымдағы үкімімен Көбекова ҚР ҚК 177-бабы 3-бөлімі «б» тармағына сәйкес (алаяқтық) мүлкін тәркілеумен 5 жылға бас бостандығынан айырылған болатын. Ол жазасын жалпы режимдегі түзеу колониясында өтеуге тиіс еді. Бірақ жазасын өтеу баласы 14 жасқа толғанға дейін кейінге қалдырылды.
Прокурордың наразылығына сәйкес Э.Көбекова қызметінен босатылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).