ОРАЛ. 20 қаңтар. ҚазАқпарат - Батыс Қазақстан облысында «Саламатты Қазақстан» мемлекеттік бағдарламасына сәйкес 2013 жылы республикалық бюджет есебінен сегіз денсаулық сақтау нысаны іске қосылды.
Облыстық денсаулық сақтау басқармасынан түскен мәліметке қарағанда, соның ішінде 1,9 млрд. теңгеге үш емхана, 566,6 млн. теңгеге бес дәрігерлік амбулатория бой көтерді. Сондай-ақ Орал қалалық көпбейінді ауруханасы құрылысын жалғастыруға 1450,0 млн. теңге бөлінді, бұл қаржы да толық игерілді. Құрылысы 2012 жылы басталған аталмыш аурухана 2015 жылы пайдалануға берілмек.
Сонымен қатар ел қазынасы есебінен 245,2 млн. теңгеге 9 нысан күрделі жөндеуден өткізілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).