ОРАЛ. ҚазАқпарат - Батыс Қазақстан облысында 2015 жылы жергілікті үлесті дамыту бағытында БҚО әкімдігі, ұлттық компаниялар, сондай-ақ ірі жер қойнауын пайдаланушылар мен өнеркәсіп кәсіпорындары арасында 44,9 млрд. теңгеге ынтымақтастық жөніндегі 39 меморандумға қол қойылды.
Облыс әкімі Нұрлан Ноғаевтың сөзіне қарағанда, осы меморандумдар аясында 26,6 млрд. теңгеге 198 келісімшарт жасалды.
Өткен жылғы он бір айда 1121,3 млрд. теңгенің өнеркәсіп өнімі өндірілді, бұл алдыңғы жылғыдан 5,5 пайызға кем. Соның ішінде кен өндіру өнеркәсібіндегі өнім көлемі 995,4 млрд. теңгені (94,5 пайыз) құрады. Бұл газ конденсатын өндірудің 2,3, мұнайдың 18,4 пайызға азаюына байланысты болып отыр.
Айта кетейік, Еуразиялық экономикалық одаққа кіретін елдерді (РФ, Беларусь, Армения, Қырғызстан) қосқанда, сыртқы сауда айналымы өткен жылғы қаңтар-қазанда 5,2 млрд. АҚШ долларын құраса, соның 4,4 млрд. доллары - экспорт, 0,8 миллиарды - импорт. Сыртқы сауда сальдосы 3,6 млрд. доллар көлемінде оң қалыптасты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).