ОРАЛ. ҚазАқпарат - 8 қазан күні сағат 16.00 шамасында Орал-Атырау жолының 103-шақырымында, Ақжайық ауданына қарасты Жаңабұлақ және Самал ауылдарының аралығында бірнеше автокөлік соқтығысты.
Ақжайық аудандық ішкі істер бөлімі әкімшілік полиция инспекторы Эльдар Манашевтің сөзіне қарағанда, «Ауди» автокөлігінің жүргізушісі қарсы бетке шығып кетіп, «Рено-Сандеро» және оның артында келе жатқан «ВАЗ-2114» автокөлігімен соқтығысуға жол берген.
Жол апаты салдарынан «Рено-Сандеро» автокөлігінде отырған жолаушы әйел, Орал қаласының 1964 жылғы М. деген тұрғыны Чапаев ауылындағы аудандық ауруханада көз жұмды. «Рено-Сандеро» көлігінің өзі өртеніп кеткен.
Ауыр жарақат алған үш адам санавиациямен, біреуі реанимобильмен облыстық ауруханаға жеткізілген.
Облыстық аурухана директоры Ерлан Тоқсановтың айтуынша, қазір екеуі жансақтау бөлімінде жатса, тағы екеуі бөлімшеде емделуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).