ОРАЛ. 4 қазан. ҚазАқпарат /Елжан Ералы/ - Батыс Қазақстан облысында жыл басынан бері 186 жол-көлік оқиғасы тіркеліп, соның салдарынан 55 адам қаза тапса,
185-і түрлі жарақат алды. Бұл туралы БҚО-ның Тасқала ауданында өткізілген «Жолдағы қабылдаулар» іс-шарасы кезінде айтылды.
Облыстық жол полициясы басқармасы бастығының орынбасары Тельман Үсеновтің айтуынша, аталмыш көрсеткіштер өткен жылғыдан жоғары болып отыр. Оның үстіне жол оқиғаларының жартысынан астамы жаяу жүргіншілерге қатысты. Биыл осындай 97 жол-көлік оқиғасы орын алса, содан 20 адам мерт болып, 82 жаяу жүргінші жарақат алды. Соның ішінде 23 оқиға балалардың қатысуымен болып, бесеуі қаза тапса, 20 жеткіншек жараланды.
Егер 2010 жылы БҚО-да 125,4 мыңнан астам автокөлік болса, биыл олардың қатары 140,1 мыңнан асты.
Тасқалада өткен «Жолдағы қабылдаулар» кезінде жүргізушілерден 26 арыз-шағым түсіп, соның 25-і қанағаттандырылды, 283 азамат сауалнамаға қатысты.
«Жолдағы қабылдаулар» өткен жылы Ақжайық, Бөрлі, Теректі, Зеленов, Шыңғырлау, биыл Сырым мен Жаңақала аудандарында өткізілген болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).