ОРАЛ. 29 мамыр. ҚазАқпарат - Шілде айында Астана қаласында өтетін ІХ ұлттық Дельфийлік ойындарға Батыс Қазақстан облысынан 20 жас дарын қатысады.
Бұл облыстық білім басқармасы мен «Өркен» қосымша білім беру орталығы өткізген іріктеу кезеңінің қорытындысы бойынша белгілі болды. Аталмыш байқауға облыстың түкпір-түкпірінен екі жүздей үміткер қатысып, олар скрипка мен фортепиано, домбыра мен қобыз, академиялық және халықтық ән, бейнелеу өнері сынды 11 аталым бойынша сынға түсті.
Дарынды жастарды анықтау мақсатында Дельфийлік ойындар Қазақстанда 2005 жылдан бері өткізіліп келеді. Оның қорытындысы бойынша ел құрамасы анықталып, ол ТМД елдерінің Дельфийлік ойындарына барады. Дельфийлік ойындар өнердің барлық түрінен 42 аталым бойынша ұйымдастырылады. Байқау жас ерекшеліктеріне қарай бөлінеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).