ОРАЛ. 15 мамыр. ҚазАқпарат - Қазақстан полициясының 20 жылдығына орай БҚО ішкі істер департаментінде ардагерлер Анна Пустовая мен Ракия Ғабитоваға құрмет көрсетілді.
Департаменттің баспасөз қызметінен Гүлшат Молдағалиеваның хабарлағанындай, шара барысында департамент бастығының орынбасары, полиция полковнигі Талғат Рахметов ардагер аналарды мерекемен құттықтап, ізгі тілегін білдірді.
Анна Ивановна Пустовая- Орал педагогика училищесінің түлегі. 16 жылдай Бөрлі аудандық ішкі істер бөлімінде жасөспірімдер ісі жөніндегі инспектор болып қызмет атқарған ол қоғамдық жұмыстарға белсенді араласып, Ақсай қалалық кеңесінің депутаты болған. Ал Ракия Ғабитова ішкі істер органы жүйесінде 33 жыл еңбек еткен. Ол қызмет атқарған Орал қалалық ішкі істер басқармасының қылмысты іздестіру бөлімі ардагерді әрдайым құрметтейді. Екеуі де медальдармен марапатталған.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).