ОРАЛ. ҚазАқпарат - Бүгін, 11 желтоқсанда Батыс Қазақстан облыстық тарихи-өлкетану музейінде соғыс және еңбек ардагері Қадыр Ғайсиннің 90 жылдық мерейтойы аталып өтілді.
Сырым ауданы Жымпиты ауылында дүниеге келген Қадыр Хабибұлы Ұлы Отан соғысында Украина, Польша, Румыния, Германия, Чехословакия жерінде болған ұрыстарға қатысып, майдан жолын Прагада аяқтады.
Елге оралғаннан кейін облыста басшылық қызметтер атқарды. Соның ішінде 1972-1985 жылдары Бөкей ордасы ауданындағы М.Мәметова атындағы кеңшарға басшылық етті. 1987-2006 жылдары облыстық ардагерлер кеңесінің төрағасы ретінде қоғамдық-саяси өмірге белсене араласты. Отан соғысы, екі мәрте Еңбек Қызыл Ту, «Құрмет Белгісі», «Құрмет» ордендерімен және медальдармен марапатталған.
Майдангерді мерейтойымен Бөкей ордасы ауданының әкімі Нұрлан Рахымжанов құттықтап, иығына шапан жауып, сый-сияпатын табыс етті. Сондай-ақ «Бөкей ордасы ауданының құрметті азаматы» атағының куәлігі мен төсбелгісін де тапсырды. Осындай құрметті атақ Бөкей ордасында шаруашылық басқарған, кейін аудан әкімі қызметін атқарған Рахман Каринге де берілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).