ОРАЛ. ҚазАқпарат - Елбасының биылғы 18 ақпандағы Жарлығымен БҚО бойынша бірқатар тағайындаулар болды.
Облыстық соттың баспасөз қызметінен хабарлағанындай, 24 ақпан күні жалпы отырыста БҚО сотының төрағасы Қамбар Нұрышев кадрлық өзгерістермен таныстырды. Атап айтқанда, Орал қаласының №2 сотына бұған дейін Орал қаласы мамандандырылған әкімшілік сотының төрағасы болған Мұрат Иманбаев, оның орнына бұған дейін Орал қалалық сотының төрағасы қызметін атқарған Ғалымжан Ищанов тағайындалды. Орал қалалық сотына енді бұған дейін БҚО сотының судьясы болған Біржан Мәмбетов басшылық етеді.
Аудандық соттар судьялармен толықты. Бөрлі аудандық сотына Азамат Сұлтантеміров, Қазталов аудандық сотына Әсел Жамантаева, Орал қаласының №2 сотына Бақтияр Жорабаев судья болып тағайындалды. Бұған дейін БҚО сотының судьясы болып жасаған Гүлжамал Тайбағарова Астана қалалық сотына судья болып ауысты.
Облыстық сот төрағасы лауазымдарына жаңадан кіріскен судьялардың қызметіне табыс тіледі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).