ОРАЛ. KAZINFORM — Батыс Қазақстан облысы бойынша экономикалық тергеп-тексеру департаменті цифрлық активтер айналымы саласында заңсыз кәсіпкерлік қызметпен айналысқан БҚО тұрғынына қатысты тергеуді аяқтады.
Департаменттің баспасөз қызметінен мәлім еткеніндей, күдікті міндетті тіркеусіз және лицензиясыз цифрлық активтермен операция жасау арқылы табыс табу схемасын жүзеге асырған.
Ол өзінің заңсыз қызметі барысында «Imrat Group» қаржы пирамидасының салымшыларынан түскен ақшалай қаражатты криптовалютаға айырбастап, кейіннен ұйымдастырушылардың криптоәмияндарына жіберіп отырған.
- Бұдан бөлек, ол басқа да жеке тұлғалардан ақшалай қаражат қабылдаған. Оның іс-әрекетінің нәтижесінде цифрлық активтерді өткізу бойынша операциялардың сомасы 155 миллион теңге болды. Істі тергеу барысында күдіктінің құны 57 миллион теңге үйлері мен автокөлігі түріндегі мүлкіне тыйым салынды. ҚР Қылмыстық іс жүргізу кодексінің 201-бабына сәйкес тергеу мүддесіндегі өзге ақпарат жария етуге жатпайды, - деп хабарлады ведомстводан.
Еске сала кетейік, бұдан бұрын БҚО-да 1267 млн теңге заңсыз несие алған серіктестік басшысы сотталғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).