ОРАЛ. 23 қаңтар. ҚазАқпарат - Ақжайық ауданына қарасты Шабдаржап ауылының тұрғыны Ақмәнет Ғалиева 103 жаста.
Аудан әкімі Нариман Төреғалиев ғасырдан ұзақ ғұмыр жасаған әженің үйіне арнайы барып, иығына қамзол жауып, басына ақжаулық тартты.
Жастайынан жоқшылық көрген, бірақ туралықтан, еңбектен қашпаған жан, бұл күнде баласы Есенгелді Сүйлейменовтің қолында. Немере-жиендері де баршылық. Қосағы Сүлеймен Қалешов те ұзақ жасаған. Ұлы Отан соғысынан жеңіспен оралған майдангер 96 жасында өмірден өтіпті. Жеті бала өсірген аяулы ананың көзі кемігенмен, көкірегі ояу, құлағы жақсы естиді. «Айналайын, балаларым, ел мерейін өсіріңдер. Еңбектерің жемісін берсін. Менің ұзақ жасауым елімнің амандығы, көңілімнің қуанышқа кенеліп жүруінен болса керек», - дейді А.Ғалиева.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).