ОРАЛ. 7 желтоқсан. ҚазАқпарат /Елжан Ералы/ - Бөкей ордасы ауданы орталығы - Сайқын ауылындағы «Қару аманаты» аталатын ескерткіштер саябағында ерен еңбектерімен есімдері ел есінде қалған 25 Социалистік Еңбек Еріне арнайы ескерткіш белгі қойылды.
Ерлердің мүсіндері тас тұғырға орнатылып, аттары айшықталып жазылды. Сол жиырма бес ердің көзі тірісі - сексеннің сеңгірінен асқан Ескендір Есімов.
Аудан әкімі Рахман Кариннің атап өткеніндей, осыдан бірер жыл бұрын өңірден шыққан төрт батырдың рухы асқақтап, тұғырға қондырылса, енді, міне, солардың жанынан 25 Еңбек Еріне белгі қойылып отыр. «Ерлік - елге мұра, ұрпаққа - ұран» десек, мұның бәрі - аға ұрпақтың ерлік істерін ешқашан естен шығармау бағытында атқарылып жатқан жұмыстар.
Бұдан кейін сөз алған Ескендір Есімов соңғы жылдары аудан көлемінде атқарылып жатқан жұмыстарға ризашылық сезімін білдіріп, елі аялаған ер қашанда бақытты екендігін толқи жеткізіп, кейінгі жас ұрпақты тек адал еңбекті сүюге шақырды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).