ОРАЛ. ҚазАқпарат - Шымкент қаласында бокстан Кеңес Одағының Батыры Қарақозы Әбдалиевті еске алуға арналған дәстүрлі халықаралық турнирде батысқазақстандықтар да жүлдегерлер қатарынан көрінді.
БҚО дене шынықтыру және спорт басқармасынан хабарлағанындай, аталмыш додаға Қазақстан, Ресей, Моңғолия, Өзбекстан, Тәжікстан, Қырғызстан елдерінен 113 боксшы қатысты. Батыс Қазақстаннан барған Алмасбек Орынғалиев 69 келі салмақта күміс, Тайман Оразбаев 60 келі салмақта қола жүлдені иеленді.
Осының алдында Ақтау қаласында бокстан Қазақстанның тұңғыш спорт шебері Шоқыр Бөлтекұлын еске алуға арналған тағы бір халықаралық турнир өткен болатын. Молдавия, Әзірбайжан, Украина, Ресей, Қазақстан, Өзбекстан, Қырғызстан, Моңғолия елдерінің боксшылары шаршы алаңға шыққан бәсекеде батысқазақстандық Сәкен Садықов 56 келі салмақта қола жүлдені олжалады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).