ОРАЛ. 12 қазан. ҚазАқпарат /Елжан Ералы/ - БҚО-ның Тайпақ ауылындағы Ақжайық аудандық ауруханасына өткен жылы «Дипломмен - ауылға» бағдарламасымен келген Жетіс Шораев шаңырақ көтерді.
Аурухананың бас дәрігері Хамит Ералиннің хабарлағанындай, Қызылорданың Аралында туып-өскен Жетіс бір жыл ішінде жұмысқа деген жауапкершілігімен ауыл тұрғындарының қошеметіне бөленді. Биыл Алматы қаласында бір айлық мамандандыру курсына барған Ж.Шораев Кәмшат есімді бірінші санатты кардиологпен көңіл жарастырып, оны Тайпаққа ала келді. Қазір жас жұбайларға аудан әкімдігінің қолдауымен 2 млн. теңгеге жеке үй сатып алынып берілді.
Жалпы, биыл аталмыш аурухана үш бірдей жас маманмен толықты. М.Оспанов атындағы Ақтөбе медицина университетін бітіріп келген педиатр Сәбира Сүндетова да баспаналы болды. Сондай-ақ Алматыдағы С.Аспандияров атындағы ұлттық медицина университетінің түлегі, стоматолог Айнагүл Ғабдуалиева еңбек етіп қана қоймай, бақытын осы Тайпақтан тауып, тұрмыс құрды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).