ОРАЛ. 21 қаңтар. ҚазАқпарат - 20 қаңтар күні допты хоккейден Ресей чемпионаты жоғары лигасының екінші тобында ойнайтын Оралдың «Ақжайығы» өз айдынында Верхний Уфалейдің «Никельщик» командасымен екінші кездесуін өткізді.
Бірінші ойынға қарағанда, «Ақжайық» бұл жолы айқын басымдылық көрсетті. «Никельщиктен» Дмитрий Чулочников 4-минутта есеп ашқанымен, екінші таймда тағы да «Ақжайық» ойыншылары ойын тізгінін өз қолдарына алды. 46-минутта Самат Аманшин таразы басын теңестірсе, 73-минутта Петр Грибанов, 85-минутта Нұрлан Оразғалиев, 87-минутта Арыстан Қазыбаев мергендік танытып, «Ақжайық» 4:1 есебімен жеңіске жетті.
Осы турдан кейін 29 ұпай жинап, үшінші сатыға орныққан «Ақжайық» 22-23 ақпан күндері Екатеринбургтің «СКА-Свердловск» командасын қабылдайды. Бұл клуб екінші топта сегізінші орында тұр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).