ОРАЛ. 14 қаңтар. ҚазАқпарат - 13 қаңтар күні Оралдың «Ақжайығы» Самара облысының «Динамосымен» екінші кездесуін өткізіп, 5:1 есебімен жеңіске жетті.
Бұл ойында Алматыда өткен қысқы Азия ойындары кезінде ел намысын қорғап, «Ақжайықтың» құрамына келіп қосылған Хромтау допты хоккейінің түлегі Сұлтан Қадыржанов екі гол соғып, көзге түсті. Сондай-ақ Арыстан Қазыбаев, Александр Шавалдин және 1995 жылғы Максим Өтебалиев бір-бірден доп енгізсе, қонақтардан Шамиль Шагеев қана мергендік танытты.
Осы ойыннан кейін 23 ұпай жинап, үшінші орынға көтерілген «Ақжайық» 19-20 қаңтарда Верхний Уфалейдің «Никельщик» командасын қабылдайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).