академиясының академигі Эдгард Воцалевский, жетекші ғылыми қызметкер, геология-минералогия ғылымдарының кандидаты Николай Жуков, зертхана жетекшісі, геология-минералогия ғылымдарының докторы, профессор Леонид Мирошниченко, мекеме директоры, геология-минералогия ғылымдарының докторы, профессор Болат Рақышев және ҚР Энергетика және минералдық ресурстар министрлігінің Геология және жер қойнауын пайдалану комитеті «Қазгеоақпарат» республикалық геологиялық ақпарат орталығының бұрынғы басшысы, зейнеткер, геология-минералогия ғылымдарының докторы Сиезбек Ақылбеков, аталған комитеттің төрағасы, геология-минералогия ғылымдарының докторы Болат Өжкенов ие болды.
Бұл ғылыми еңбектің тәуелсіздік алғаннан кейінгі жылдары нарықтық экономикаға көшкен және барлық кен орындары кешенді болып келетін Қазақстан үшін зор маңызы бар. Себебі қазіргі заманауи техникаларда қолданылатын көптеген сирек кездесетін бағалы элементтер кен құрамында болғанымен, осы уақытқа дейін өңделмей келген еді. Ал дүниежүзінде соңғы 20 жылда осы сала қарқынмен дамып келеді.
ҚР ҰҒА академигі, КСРО және Қазақ КСР мемлекеттік сыйлықтарының және Қ. Сәтбаев атындағы сыйлықтың лауреаты Айтмұхамет Абдулиннің «Егемен Қазақстан» газетінде жарық көрген «Мемлекеттік сыйлыққа ұсынылған Қазақстан минерагениясының мол мүмкіндіктері» атты мақаласында «Соңғы ондаған жылдар бойы Қазақстан экономикасы мен салалары геожүйенің ортақұрушы және өмірді қамтамасыз етуші функцияларын қажетінше ескерместен, табиғатты экстенсивті пайдалану жолымен жүруі салдарынан республика аумағындағы қазіргі экологиялық ахуал тіпті де қолайлы болып отырған жоқ және оның нашарлауы жалғаса түсуде. Қалыптасқан үрдісте түбегейлі бетбұрысқа қол жеткізу сапалық жаңа стратегияға - қоршаған ортаны қорғау және әлеуметтік-экономикалық даму мәселелерін үйлестіруді көздейтін тұрақты дамуға көшу арқылы ғана мүмкін болады. Сондықтан да қазіргі кезде Қазақстанның сыртқы және ішкі саясатындағы басым бағыттардың бірі экологиялық жағынан қауіпсіз және тұрақты дамуға көшу болып табылатындығы сөзсіз.
Жоғарыда айтылған жаңа саяси, экономикалық және геологиялық жағдайлар Қазақстанның пайдалы қазбалар кен орындарын іздестірудің жаңа ғылыми-теориялық талдамалар мен технологияларды қолдана отырып, инновациялық шешімдер жасауға негізделген жаңа стратегиясы мен тактикасын әзірлеуді туындатты. Сондықтан да осы заманғы теорияларға, құрылымдар мен технологияларға арқа сүйейтін іргелі минерагениялық және геохимиялық ғылымдардың рөлі арта береді. Олардың озық дамуы ғана кен орындары ашылуының сенімді болжамы мен минералдық шикізаттардың интенсивті түрде азайып бара жатқан қорларын толықтыруды, оларды қоршаған ортаны қорғау нормаларын сақтай отырып, ұтымды пайдалануды қамтамасыз етуге қабілетті.
Мұның өзі бәсекеге қабілетті жаңа ірі кен орындарын анықтау үшін күш-жігерді шоғырландыратын аймақтар мен тораптарды нақтылауға мүмкіндік береді. Қ.Сәтбаев атындағы Геологиялық ғылымдар институты осы болжалдық-минерагениялық және болжалдық-геохимиялық бағыттардың бастауында болған және әлемдік геологиялық қоғамдастық мойындап отырған ғылыми орда болып табылады», дейді.
Мемлекеттік сыйлыққа ие болған ғылыми еңбекте Қазақстанның нақты материалдарына талдау жасалып, «Қазақстанның минерагениялық картасы» негізінде ел аумағын миенарагениялық аудандастыру жүргізіліп, қайта бағалауға және бәсекеге қабілетті жаңа кен орындарын анықтау болашағы айқындалған.
Қоғамдық талқылаудың нәтижесінде бұл ғылыми еңбекке 23 пікір түссе, оның 9-ын АҚШ, Қытай, Ресей, Украина сынды шет елдердің ғалымдары берген. Сонымен қатар 1 жарияланым жарық көрген.
Зерттеулер нәтижелері монография, карта, түсіндірме жазба және тағы басқа түрде қазақ, орыс және ағылшын тілдерінде жарық көріп, бәсекеге қабілетті түрлі пайдалы кен орындарын табуға Қазақстан аумағының үлкен әлеуеті бар екендігін көрсеткен. Жүргізілген зерттеулер нәтижелері ҚР ЭМРМ Геология және жер қойнауын пайдалану комитеті, сондай-ақ жақын және алыс шетел жер қойнауын пайдаланушылардың тапсырысы бойынша жүзеге асырылатын өндіріс жұмыстары үрдісінде кеңінен қолданылады. Ғалымдардың дайындаған және жүзеге асырған ғылыми-техникалық шешімдер кешені мен зерттеу нәтижелері Қазақстанның минералдық-шикізаттық әлеуетін арттыратын инвестиция тарту үшін маңызды тетікке айналады.
Зерттеу нәтижелері республикалық және халықаралық форумдарда, 2008 жылы Ослода өткен Халықаралық геологиялық конгресте жан-жақты сараптамадан өтті.
Жүргізілген кешенді іргелі-теориялық зерттеулер жоғары деңгейде орындалған және қазақстандық ғылым мен техниканың әлемдегі алдыңғы қатарлы жетістіктер деңгейіне шығуына мүмкіндік береді.