ОРАЛ. 22 қаңтар. ҚазАқпарат /Елжан Ералы/ - Ертең Қазан қаласында допты хоккейден кезекті әлем біріншілігі басталады.
Дүниежүзілік додаға Қазақстан құрамасы да қатысады. Бұл жолы команданы Қазақстанның еңбек сіңірген жаттықтырушысы Алексей Никишов бастап бармақ. Осыған дейін Қазақстан құрамасын екі мәрте қола жүлдегер атандырған еліміздің еңбек сіңірген жаттықтырушысы, тағы бір белгілі хоккейші Александр Ионкин бұл жолы аға бапкер ретінде қатыспақ.
Қазақстандықтар «А» тобында алғашқы күні өзінің басты қарсыластарының бірі Норвегия құрамасымен күш сынасады. Содан кейін АҚШ, Финляндия, Ресей, Швеция хоккейшілерімен шеберлік байқасады. Жүлдеге таласу үшін үздік төрт команданың қатарынан табылу шарт.
Әлем біріншілігі 30 қаңтарда мәреге жетеді. Қазақстандықтардың команда бастығы Марат Маңғубаевтың айтуынша, биыл да команда қола жүлде үшін күреседі. Ең бастысы, төртінші орыннан төмендемей, өз деңгейінде қалу.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).