ОРАЛ. ҚазАқпарат - "Еуразиялық одақ аясында Беларусь елімен де байланыс нығаяды". «Орал механикалық зауыты» ЖШС бас директорының орынбасары Анатолий Смирнов осылай деді.
Оның айтуынша, осы бағытта «Орал механикалық зауыты» ЖШС белсендірек жұмыс жасамақшы. Мысалы, «МТЗ», «Беларусь» тракторлары Минск мотор зауытының қозғалтқыштарымен жұмыс істейді. Бүгінде бұл техникалардың түрлі модификациялары бар. Міне, Орал механикалық зауыты - соған иінді біліктер шығаратын Қазақстандағы бірден-бір кәсіпорын. Сондай-ақ аталған бөлшек автобустар мен өзге де техникаларға лайықталып зауыт конвейерінен әр қиырға жол тартады. Иінді біліктің 80 пайызға жуығы Беларусь пен Ресейге экспортталады. Кедендік одақ шеңберінде оның көлемі жылдан-жылға ұлғайып келеді. Нақты деректерге қарағанда, өткен жылдың қорытындысы бойынша оралдық өнімнің 91 пайызы экспортқа жөнелтілді.
«Тәуелсіздіктің алғашқы он жылымен салыстырғанда, қазір зауытта өнім көлемі бес есе ұлғайды. Осының бәрі ықпалдастық пен кедендік ресімдерді оңтайландырудың жемісі мен нәтижесі деуге болады», - деп түйіндеді ойын А.Смирнов.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).