Еуроодақ кеңесінің президенті РФ Президенті Д.Медведевке көңіл айту жеделхатын жолдады

БРЮССЕЛЬ. 25 қаңтар. ҚазАқпарат /Димаш Сыздықов/ - Еуроодақ Кеңесінің (Еуроодақтың жоғарғы органы) Президенті Херман Ван Ромпей Мәскеудегі «Домодедово» әуежайында болған лаңкестік оқиғаға байланысты Ресей Президенті Дмитрий Медведевке көңіл айтып, жеделхат жолдады, деп хабарлады Еуроодақ Кеңесінің баспасөз қызметінен.

«Адам құрбандықтары орын алған «Домодедово» әуежайындағы лаңкестік әрекетті мен үзілді-кесілді айыптаймын. Бұл қылмыс мені қатты ашуландырып отыр, осынау әрекеттің сыртында тұрғандарды тауып, оларды жазалауға үндеймін. Қаза болғандардың отбасыларына көңіл айтамын», - делінген Еуроодақ басшысының хабарламасында.

Еуроодақтың Сыртқы істер және қауіпсіздік саясаты жөніндегі жоғары өкілі Кэтрин Эштон ханым да Мәскеудегі лаңкестік әрекетті айыптап, қаза болғандардың отбасылары мен жақындарына көңіл айтты. «Осынау жантүршігерлік шабуыл кезінде бейкүнә адамдар қаза болды. Еуроодақ лаңкестік әрекеттердің барлығын айыптайды және ресейліктерге көңіл айтады», - делінген еуропалық шенеуніктің мәлімдемесінде.

Естеріңізге сала кетейік, 24 қаңтар күні түстен кейін Мәскеудегі «Домодедово» әуежайында лаңкестік әрекет орын алып, оқиға салдарынан ондаған адам қаза тапты, жүздеген адам жараланды.