ОРАЛ. ҚазАқпарат - Футболдан Қазақстан премьер-лигасына қайта оралуды мақсат етіп отырған Оралдың «Ақжайығы» Түркиядағы оқу-жаттығу жиынын жалғастыруда.
«Ақжайық» футбол клубының баспасөз қызметінен түскен түскен мәліметке қарағанда, Сергей Волгин жаттықтыратын батысқазақстандықтар жергілікті «Ченкириспор» командасымен қос кездесу өткізді. Бірінші ойын 3:2 есебімен алаң иелерінің пайдасына шешілді. Мұнда «Ақжайықтан» Ізім Сәрсекенов пен Ақжол Серікжанов доп соқты. Екінші матч 1:1 есебімен тең аяқталды. Бұл жолы да А.Серікжанов мергендігімен көзге түсті.
Айта кетейік, бұрын «Жетісуда» доп тепкен Ақжолға қоса Антон Шурыгин, Азамат Әубәкіров, Коне Драмане, Маруско Матич, Нұрболат Қалменов, Аслан Оразаев, Милан Яблан сынды ойыншылар сыннан өтуде. Бұлардың қайсысы «Ақжайыққа» алынатыны оқу-жаттығу жиындарынан кейін белгілі болады. Кейбір дерек бойынша Қарағандының «Шахтерінде» бағын сынап көрмекші болған команданың белді ойыншыларының бірі Руслан Хайыров қайтып оралған.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).