«Ақжайықтың» бапкері Любомир Петрович команда құрамына бірқатар өзгеріс жасап, босниялық Недо Турковичтің орнына Николай Забродинді, Ізім Сәрсекеновтің орнына Еркін Тапаловты шығарды. Бұл көп ұзамай-ақ өз жемісін берді. 9-минутта қонақтар қақпасы алдындағы қарбалас сәтте Н.Забродин өз мүмкіндігін қалт жіберген жоқ. Екінші таймда «Ақжайықтың» капитаны Евгений Коструб «атыраулық» ойыншыдан допты тартып алып, Еркін Тапаловқа дәл пас берді. Қақпашымен бетпе-бет келген жас футболшы премьер-лигадағы алғашқы добын соқты. Кездесудің екінші кезеңінде Павел Черниді алмастырған Недо Туркович есепті 3:0-ге жеткізді. Бірақ «Ақжайықтың» бұл жеңісі қуаныш сыйлаған жоқ. «Восток» Таразда жергілікті клубпен тең ойнап, 20 ұпай жинаса, «Жетісу» өз алаңында «Тобылды» 1:0 есебімен ұтып, тоғызыншы орынға көтерілді. Сөйтіп 19 ұпай жинаған «Ақжайық» премьер-лигамен қош айтысты. 11-орынды иеленген өскемендіктер келесі жылы премьер-лигада өнер көрсету үшін Семейдің «Спартагымен» қосымша матчта күш сынасады.
08:46, 03 Қараша 2013
Футбол: Оралдың «Ақжайығы» «Атырауды» ірі есеппен жеңгенімен, бірінші топқа түсіп қалды
ОРАЛ. 3 қараша. ҚазАқпарат - Футболдан Қазақстан чемпионатының соңғы турында Оралдың «Ақжайығы» өз алаңында «Атырауды» қабылдады.