Футболдан бірінші лигада «Ақжайық» пен «Елімай» командалары тең тарқасты

ОРАЛ. ҚазАқпарат – Футболдан бірінші лига командалары арасында Қазақстан чемпионатының алғашқы турында Оралдың «Ақжайығы» өз алаңында Семейдің «Елімай» командасын қабылдады, деп хабарлайды ҚазАқпарат тілшісі.

Белді ойыншылармен жасақталған қос клуб та премьер-лигаға шығуды мақсат етіп қойған-ды. Сондықтан олардың бірінші лиганың фавориттері саналуы заңды еді.

Бірінші таймда командалар алма-кезек шабуылдағанымен, есеп ашылған жоқ.

Екінші кезеңде 65-минутта «Ақжайықтың» Қазақстан кубогі үшін 4 ойынында 13 гол соғып, сұрмерген атанған Арман Смаилов есеп ашты. Алайда іле-шала, 68-минутта қонақтардан Берік Айтбаев таразы басын теңестіріп кетті – 1:1. Бұдан кейін де матч тартысты өрбігенімен, есеп өзгерген жоқ. Тіпті ойын соңында «Елімайдың» бір футболшысы алаңнан қуылса да, Игорь Прохницкий жаттықтыратын оралдықтар бұл мүмкіндікті пайдалана алмады.

Сондай-ақ бұл күні тағы бір бәсекеде «Академия Оңтүстік» өз алаңында астаналық «Жеңіске» есе жіберді – 1:3.

Еске сала кетейік, бұдан бұрын футболдан бірінші лига командалары арасындағы ел біріншілігі басталатынын жазған едік.