Төрт жыл бұрын ҚР Президентінің Жолдауында мемлекеттік органдардың халықпен «бір терезе қағидаты» арқылы жұмыс атқаруы міндеттелген. «Бір терезе қағидатының» бірқатар ерекшелігінің бірі - уәкілетті органдардың қызметкерлерімен арадағы байланысқа шек қойып, сол арқылы сыбайлас жемқорлықты азайту. Бүгінде мұндай орталықтарда 57 қызмет түрі бойынша халыққа қызмет көрсетіліп келеді. Болашақта 132 қызмет енгізілмек.
Орталық күніне 800-1000 адамға дейін қызмет көрсетеді. Тұрғындар көбінесе құжаттандыру, қалада тұрғылықты мекен-жайға тіркеуге тұру және шығу мәселесімен, сондай-ақ жылжымайтын мүліктерді тіркеу, істі болған-болмағандығы туралы анықтама алу үшін келеді. Бүгінгі таңда аты-жөнін ҚР Президенті Жарлығына сай, ұлттық негізде жаздыруға ықыластылар саны арта түсті. Аудан көлемінде кәмелеттік жасқа толып, төлқұжат алып жатқандар қатары көбейіп отыр. Сондай-ақ қалаға тіркеуге тұрушылар еселене түсуде. Ал ең бастысы - табиғи өсім көбейіп отырғаны назар аударуға тұрарлық.
- Бұл қызметтердің ерекшеліктері көп, бірақ, ескеруге тұрарлық артықшылығы бар. Дамыған елдерде халыққа қызмет көрсету орталықтары азаматтардың өзіне қатысты мәліметті игеріп, құжат саласын реттеуге және уақытын үнемдеуге ықпал етеді. Осы тәжірибені ұстанған біздің орталық құжат саласындағы барлық қызмет түрін бір салаға жинақтауда және оны жүзеге асырушы мекемелерге жеткізуді реттеуші мекеме ретінде өзін өзі ақтады. Енді орталықтың қызметін өз еліміз бен әлемдік үрдіске сай жетілдіруді мақсат етіп отырмыз,-деді Алматы аудандық Халыққа қызмет көрсету орталығының директоры Айнұр Дощанова.
Алматы аудандық халыққа қызмет көрсету орталығында электрондық құжаттандыру жоспарлы түрде жүргізізіліп, тіркеу, құжат қабылдау және оның атқарылу мерзімін оңтайландыру сәтті іске асырылуда. Қызметкерлердің кәсіби біліктілігін арттыру үшін уәкілетті органдардың мамандарымен бірлесіп арнайы семинарлар жүргізіледі.
Үстіміздегі жылғы сәуір айында ел Үкіметі қабылдаған дағдарысқа қарсы бағдарламаны іске асыру мақсатында Қаржыгерлер қауымдастығы және Әділет министрлігінің Тіркеу қызметі комитеті арасында ынтымақтастық пен өзара түсіністік туралы Меморандумға қол қойылды. Меморандумда Халыққа қызмет көрсету орталығымен ынтымақтаса отырып атқарылатын бірталай іс-шаралар көрсетілді. Елордалық орталықтар өз жұмысын қоғам талабына сай икемдеуге көшті. Атап айтқанда, жылжымайтын мүлікке құқықтарды және соған байланысты жүргізілетін қағаз-құжаттарды тіркеу тәртібін үш жұмыс күніне дейін (тұрғын үйге жатпайтын жылжымайтын мүлік үшін) стандартты тариф бойынша қысқартуға келісілді. Несиелендіру жұмыстарын оңтайлы атқару үшін Халыққа қызмет көрсету орталығында жүргізілетін болды. Банктерде де Халыққа қызмет көрсету орталығының өкілдеріне орын берілді. Мысалы, Алматы аудандық халыққа қызмет көрсету орталығы 2008 жылдан бері Халық банкімен, ТұранӘлемБанкімен және Темір банкпен, Каспий банкі секілді бірнеше банктермен өзара ынтымақтасып жұмыс істеп келеді. Бұл ретте, жылжымалы және жылжымайтын мүліктерді тіркеу және ақпараттық анықтамалар беру жүзеге асырылуда.
Тіркеу тәртібі кезінде тараптардың кепіл шартының болуын талап етпеу, яғни бас банктің мөрі басылған, өкілетті тұлғаға ғана берілетін сенімхаттың негізінде тіркеуге мұрсат етілді. Соған орай, бүгінде осы орталықтар пен банктер, уәкілетті органдар арасында тығыз байланыс орнады.
Елбасының «Дағдарыс арқылы жаңару мен дамуға» Жолдауындағы талаптарды Халыққа қызмет көрсету орталықтары лайықты атқарып келеді. Соған орай, Үкімет қабылдаған дағдарысқа қарсы бағдарлама аясында екінші деңгейлі банктердегі қайта қаржыландыру шараларына атсалыса бастады. Банктерде жұмылдырылған қызмет көрсету орталықтары ашылды. Орталықтың қызметкерлері банктерге барып, азаматтармен әртүрлі сипатты жұмыстар жүргізеді. Ол үшін арнайы жұмыс тәртібі белгеленген. Екінші деңгейлі банктерде Халыққа қызмет көрсету орталығының «терезелері» ашылып, аталған банктермен арада тиісінше жұмыс жүргізіліп келеді.
Сондай-ақ, Халыққа қызмет көрсету орталықтарында да сыбайлас жемқорлықты алдын алуға көптеген шаралар қолданылуда. Соның бірі «Нұр Отан» халықтық-демократиялық партиясы Орталыққа келген азаматтардың өтініштері мен шағымдарын қабылдауға арналған жәшіктер орнатты. Әрбір инспекторлар мен консультанттардың жұмыс орнында шағым кітапшалары қойылған. Әрбір қызметкердің жұмыс аумағын қадағалайтын жаңа технологиялық үлгідегі бейнекамералар орнатылды.
Азаматтардың құжат қабылдау мәселесін жеңілдету үшін орталықта ақпараттық жүйе енгізілді. «Ақпараттық портал» деп аталатын арнайы штрих-коды бар. Халыққа қызмет көрсету орталығы «Ақпараттық портал» арқылы мемлекеттік мекемеге қолхат ретінде құжаттарды тасымалдау процесін реттейді. Порталдың ең басты қызметі құжаттар тізімінің автоматты түрде мұқият сақталуын және дайын құжат беру бөліміне қайтып келуін қамтамасыз етеді. Барлық құжат осы портал арқылы өтеді, яғни барлық құжаттар Халыққа қызмет көрсету орталығы арқылы қадағаланады.
«Біздің орталық халық саны күн сайын көбейіп келе жатқан елордада қызмет көрсету мәдениетінің лайықты атқарылуын мақсат етеді. Ал Халыққа қызмет көрсету орталығының алдында тұрған ең үлкен міндет - бұл халыққа көрсетіп жатқан қызметтердің сапасын арттып, қағазбастылыққа қатысты келеңсіздіктерді азайту», дейді А. Дощанова.