ОРАЛ. Мамырдың 7-сі. ҚазАқпарат /Елжан Ералы/ - Бөкей ордасы ауданының Хан ордасы ауылында Ұлы Отан соғысында қаза тапқандарға арналған ескерткіш ашылды,
деп хабарлайды ҚазАқпарат тілшісі.
Ескерткішті аудан әкімі Рахман Карин мен майдангер Нәсіпқали Жұмағалиев ашып, соғыста қыршын кеткен боздақтардың аты-жөні жаңғыртылып отырғандығын атап өтті. Бөкей ордасы ауданынан майданға 4613 адам аттанса, соның 3028-і қайта оралмады. Мемориалдық кешеннің авторы - «Маэстро» ЖШС директоры Ольга Назарчук. Кешеннің ортасында Отан соғысы ордені бейнеленген биік стелла орнатылса, оның үш жағындағы гранит тақташаларынан 3028 боздақтың есімдерін оқуға болады. Құрылыс жұмыстарын «Батыс Жас-Ар» ЖШС (директоры Армат Жантасов) жүргізді. Орда ауылдық округінің әкімі Рүстем Зұлқашевтің сөзіне қарағанда, кешендегі тізімге кейін анықталған 65 ордалықтың есімі енбеген. Сондықтан қосымша тақталар орнату жолдары қарастырылатын болады.
Мерекелік шара барысында соғыс және тыл ардагерлеріне медальдар мен сыйлықтар табыс етілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).